小三從來就一定係第一個被痛恨嘅角色。對於當上小三，我曾經都係一個過來人。
我嘅故事發生喺我剛入行跳舞嘅時候，遇到”大師兄”舞步乾淨俐落非常吸引，加上師兄強烈”令我誤會”嘅攻勢，就喺不知不覺間瞬間撻着。
男人就係咁賤，佢擺明車馬有女朋友而你自己仲要送上門嘅就係願者上釣，所以更犯賤嘅其實係自己。坦白講，我明知係錯，但係當下嘅我覺得既然魯莽咁開始咗第一步就唔想死心；當下嘅我覺得仍然要堅持係因為佢同我講過：我好快會同我女朋友分手。
當時我只敢講比一個好友知道，就算佢知道我都唔敢講晒全部。身為小三，你就係如此不被眾人所容納，無論你點講都好都一定係你唔啱，永遠一定係會俾人judge你先而唔係judge個主角，再加上大家係同行更加要守密。由於我無人可以真正傾訴，所有快樂與痛苦由自己一力承擔。
我總係靜靜地等佢電話，如果喺夜晚佢電話熄咗或者長響唔接，就代表佢同緊女朋友一齊。呢一種一點點孤單嘅感覺特別喺節日假期尤為明顯。我就似喺佢嘅網絡平台，佢想幾時log in log out全由佢操控，有時甚至佢登入自己嘅身體之後要匆匆離開返回現實世界，你都只可以強顏歡笑。
每當我苦苦掙扎，覺得自己應該要離開呢段關係嘅時候，每一次嘅見面又會令我嘅痛苦一掃而光。曾經有次為免除佢女朋友嘅疑慮，佢特登帶埋我同佢女朋友三個一齊同枱食飯。真係好似睇戲咁老土，我哋喺女朋友面前一路食飯，一路喺枱底偷偷拖住手。我仍然記得嗰一刻我好引以為榮，我望住佢女朋友雙眼覺得自己贏咗，覺得佢係蠢女人，連自己嘅男人將要離開佢都睇唔透。
半年過後，佢哋當然仍然無分到手。
從突然彼此擦出火花，以為自己可以活在黑暗裏偷偷地去愛着一個人，自己仲要懶醒戥正室可憐...到最後我只見到佢對女朋友嘅”不離不棄”，對我卻無一點不忍不捨。我嗰刻先至恍然大悟，腦海浮過佢女朋友嘅影像，好想同佢講一句：原來我先至係世界上最蠢嘅女人。
當你一開始承諾唔影響佢家庭、唔會加添佢嘅心理負擔，就等於承認你不過係一頓free lunch，而當世上沒有真正嘅免費午餐，同時女人嘅佔有慾係會隨時間漸漸膨脹，我哋最終都總會付出代價。借返嚟嘅歡娛，再有感情嘅都要物歸原主 — 除非你係卡蜜拉。
查理斯王儲為咗卡蜜拉放棄戴安娜王妃，包括聲譽地位及所有一切，最後更不理任何抨擊，在接近六旬完成婚禮迎娶卡蜜拉。一個男人若果愛你愛到覆水難收嘅地步，佢真係會為你放棄一切。但係呢個世上有幾多個查理斯？At least 你而家呢個唔係囉... 因為佢愛自己多過愛你。
男人逢場作戲，女人假戲真演。你唔係必須要愛呢個人，你唔係必須要受委屈，你唔係必須要做小三，但你必須要愛自己。
你，其實係有選擇。共勉之。
#小三告白 #成個世紀之前 #你其實係有得揀 #女人像鹽
Search